Search

The lourensbreytenbach.com BLOG

Newest stuff first. Scroll DOWN to see ....
Wednesday, October 4, 2017

Raad vir die lewe

Van Mnr Lourens Breytenbach (Hoërskool Roodepoort)

  1. Die lewe is kort en die aarde is nie ons huis nie, so hou jou oog op die Ewigheid en wees 'n nederige en gelowige kind van die HERE.

  2. As iemand jou wil slegsê of afkraak, sê vir hulle:
    "Your opinion of me ... has nothing to do with me!"
    Iemand het een keer gesê: "In order to live a free and happy life, one should live independent of the good opinion of other people."

  3. Moenie "fake" (kunsmatig) wees nie. Niemand kan werklik opregtheid naboots nie! Wees eerlik teenoor jouself en almal om jou.

  4. Omring jouself met mense wat binne en buite mooi is. En kry vir jou mooi goed om jou lewe op te helder. Dit hoef nie geld te kos nie. En wees entoesiasties oor elke dag. Dit breek elke oggend. 

  5. Moenie die lewe te ernstig opneem nie. Lag gereeld en loop rond met 'n ondeunde (stoute) glimlag op jou gesig. Maar let wel: Neem jou familie, vriende, werk en jou liefdes baie ernstig op - leef met passie! 

  6. Wees liewer die minste in 'n konfrontasie. Sê gou jammer en vergewe sommer dadelik. Maar as jy jou man/vrou moet staan - kry jou feite reg en baklei hard!

  7. Moenie heeltyd probeer "slim" of "smart" wees nie. Ken jou plek en bly gereeld stil en luister na wat mense vir jou wil sê. Respekteer ouer mense en leer by hulle. En leer jongmense, veral kinders, hoe om gelukkig te wees. Dis so belangrik om geluk te KIES!

  8. Daag op, wees betyds, wees betroubaar en hulpvaardig. Doen jou werk met liefde en doen meer as jou deel. Almal sal jou onthou vir jou diensbaarheid.

  9. Wees sterk en loop regop. Trek jou skouers terug en lig jou ken op! Moenie behoeftig (needy) wees nie. Verdien en spaar jou eie geld. Moenie spunge op mense nie. Wees vrygewig en gee groot tips (fooitjies) aan mense wie goeie diens lewer. Hulle verdien dit.

  10. Moenie altyd besig wees nie. Ontspan doelgerig en wees rustig in stilte in jou kamer of waar jy ookal kan. Veral in die natuur. Wees lief vir die aarde. Kyk na die maan en wolke. Bewonder insekte en plante. Wees lief vir diere. Dis deur stilte en die Natuur wat die Heilige Gees met jou sal praat en jou leiding sal gee, Lees die Bybel. Veral Jesus se woorde.

  11. Drink baie water. Eet wanneer jy honger is. Wees aktief en stap/oefen baie. Maar onthou - tjoklits en biltong is goed vir jou! Gooi weg al die pille en gebruik Cellfood en Moringa. Google dit.

  12. Vergewe jouself en ander mense wie jy dink jou seergemaak het. Dis net die Ego of Duiwel wat lekker kry as jy skuldig voel, kwaad of bang is, verveeld raak of sommer net ongelukkig is. 

  13. Leer en lees soveel as wat jy kan. Dra jou bril (kry een as jy nie mooi kan sien nie) Vind "stuff" uit! Wees 'n spons vir kennis. Leer hoe om behoorlik te kan lees, skryf en spel in Afrikaans en Engels. En leer somme maak. Ken jou tafels!

  14. Pas jou tande op. Only floss the teeth you want to keep!

  15. Goeie musiek, flieks en boeke is die sleutel tot vreugde in jou lewe. Maak seker jy het 'n baie goeie rusbank en bed waarop jy hierdie dinge kan geniet.

  16. Reis en geniet die wêreld. Dis nie geskep om ons te vernietig nie - dis gemaak om ons te help leer en verander. Dis ons speelplek - ons moet kyk na ons moeder Aarde. En dis belangrik, anders sal jy as jongmens se kinders nie daarin kan leef nie. 

  17. Hou gereeld 'n lekker partytjie en kuier hard! Maar moenie drink en bestuur nie. Moenie rondslaap nie. Wees lief vir EEN persoon wat in 'n eksklusiewe verhouding met jou is.
    Help skoonmaak en opruim. Was die skottelgoed en tel die stompies op. Koop blomme vir die tannie. Koop vir die oom 'n bietjie biltong.

  18. Moet nooit te hartseer wees nie. Richard Bach het gesê:
    "Don't be dismayed at goodbyes. A farewell is necessary before you can meet again. And meeting again, after moments or lifetimes, is certain for those who are friends."

  19. Glo dat goeie dinge sal gebeur ... en dit sal. Laat jou oë blink as jy met mense gesels. Vertel 'n grappie. Gee oumense 'n druk totdat hulle bene kraak! Betaal jou huishulp R50 meer as ander mense. 

  20. Moenie jou tyd mors nie - dis so kosbaar. Wees 'n gelukkige en private mens. Jy mag nee sê. Jy hoef nie elke "text" te beantwoord nie. Jy hoef nie elke "post" te share of te reageer op alles op jou foontjie nie. Sit die ding af vir twee dae. Of langer!

  21. Maak jou eie besluite. Dis jou lewe. Vra raad; hoor wat ander sê ...  en dan doen jy wat JY wil. 

Nou goed ... dit is genoeg!

Ek is baie lief vir julle almal. Dankie dat julle julle lewens met my gedeel het. My kinders vir vyf jaar!

 

Liefde,

Mnr Lourens Breytenbach


Tuesday, September 13, 2016

Snoeiskêr                (‘n Kortverhaal deur Lourens Breytenbach)

 Vergewe asseblief die gebrek aan behoorlike leestekens. Lees maar net.

                                                                                                         13 September 2016

Carlos sit voor die deur van sy tuinwoonstel met ‘n snoeiskêr en ‘n stuk biltong. Hy staar na sy pêns. Die krakende plastiekstoel skop vas teen die sementblad wat graag ‘n stoep wil wees. As hy stadig opkyk is daar meer sement.

Wie het gedink pre-cast mure is oulik, dink hy. Dis erger as palisades: bliktronkstawe vir banggatte! ... Dun, versplinterde swaarde wat skaars ‘n hond kan inhou ... wat nog gesê ‘n dief uithou!

Maar Carlos is nie ontsteld nie. Hy glimlag met ‘n sug as hy opkyk en ‘n duif bo die muur sien verbyvlieg. Hy vat ‘n sluk van sy dop en ‘n trek van sy sigaret.

Vyf-en-flippen-veertig, dink hy. Ag dêmmit ... ek is middeljarig! Hy smeer sy stompie halfhartig teen die spinwiel en druk die knop van sy asbakkie. Die vonke verdwyn in nog ‘n pens in. Carlos blaas die rook geduldig uit. Hy kyk op en word getref deur die skrille, pragtige kontras tussen die blou van die lug bo hom en die skokkende, skielike groen van die bome daaronder.

Sy glas is vetterig. Ten minste is die biltong lekker. ‘n Geskenk van sy ou moeder vir sy verjaardag. Hy sny nog ‘n stukkie af met die snoeiskêr en kou lekker daaraan terwyl hy oor alles dink. Die potplante om hom is sy tjommas. Die opgerolde tuinslang lê onder die kraan – geduldig, rustend en dankbaar vir die ontkoppeling.

Skielik spring daar ‘n ding oor die muur voor hom. Dit beweeg vinnig en kap hom teen sy kop. Die laaste wat hy sien – terwyl hy ’n skerp pyn deur sy skedel voel skiet – is ‘n bloedstreep oor sy biltong ... en die snoeiskêr wat deur die lug trek.

Dis ‘n halfuur later. Carlos proe bloed deur sy oopgevlekte lippe. Alles is warm en taai. Sy oë werk nie deur die rooi nie. Hy is vasgemaak en lê omgedop. Hy sukkel om asem te kry. Sy kop klop van die pyn en adrenalien.

As hy uiteindelik probeer regop sit voel hy hoe die sement teen sy skouer skuur. Sy polse pyn en sy hande pof bloedrooi teen wat cable-ties moet wees – dit gly en knyp.

Dan hoor hy geluide in sy woonstel. Glase wat breek, kaste wat oop-en-toe kap en ... die gril-stem van sy aanvaller. Wat erger is ... Ta! is op sy foon – besig om met iemand te gesels. Die vermetelheid!

Hier gaan ek nie dood vandag nie, dink hy. Ek gaan nie uit-freak nie! En dan val dit hom by: hy is buite ... en die rower is binne ... hoe ironies!

Terwyl die dief sy huis omkeer, probeer Carlos om nie te raas nie. Maar in sy pogings om om te rol stamp ‘n potplant om. Sewe sekondes later en sewe treë verder kyk die rower by die voordeur uit en Carlos sien deur skrefies-oë hoe sy vyand lyk.

Dié kyk vir hom, sien dat hy nie beweeg nie, vloek hom, en gaan aan met sy plundertog binne. En sy klakkelose foongesprek.

Hier gaan ek uitkom, dink Carlos. Nou spuit die adrenalien meer as die bloed. Hy voel naarstigtelik rond met sy vasgebinde hande agter sy rug.

Dan ... hoe op aarde is dit moontlik ... voel Carlos sy snoeiskêr in die grond tussen die skerwe van die stukkende pot!

Hy sny homself los en vryf dadelik sy oë skoon met ‘n mou. Hy kyk rond. Dan deur die venster ... Ta! Is nogsteeds binne besig. Besig om te breek en praat!

Nou spoel Carlos stilletjies-kruipend, buite sig, sy hande onder die buitekraan af en was sy bebloede gesig. En dan sien hy deur die venster hoe die dief op sy bed staan en pie-pie. Nogal met die een hand. En met die ander een praat dit steeds op dit se foon.

Carlos kry vinnig sy gedagtes agtermekaar. Hy is rustig. Ek moet, dink hy, as ek hier klaar is, vir Ma bel om dankie te sê vir die biltong.

Sewe sekondes later en sewe treë verder tref ‘n ding die rower teen die kop.

‘n Halfuur later word Ta! wakker. Hy voel hoe bloed oor sy lippe en oë tap. Sy kop is seer. Hy is vasgebind.

Hi, sê Carlos. Jy’s seker honger. Is jy lus vir ‘n stukkie biltong?

Waar is my snoeiskêr?


Sunday, April 17, 2016

My newest projects include Regmerk.co.za and Tickmark.co.za. These new websites are the Afrikaans and English versions of my Mathematics help sites for learners in the senior phase (grade 7 to 9).

The aim of these projects is to help parents and teachers whose learners struggle with maths to get ahead. Visit my new websites for more info.


Tuesday, December 23, 2014

Welcome! This is my first blog post for my new website (Lourensbreytenbach.com). 

You can also see my old/previous blog here or follow me on Facebook and Twitter.